잠언 28장(히브리어)

1. רָשָׁעִים נָסוּ וְאֵין רֹדֵף וְצַדִּיקִים כִּכְפִיר יִבְטָח.
2. בְּפֶשַׁע אֶרֶץ רַבִּים שָׂרֶיהָ וּבְאָדָם מֵבִין יֹדֵעַ כֵּן יַאֲרִיךּ.
3. גֶּבֶר רָשׁ וְעֹשֵׁק דַּלִּים מָטָר סוֹף דָּבָר לֹא יִהְיֶה.
4. עֹזְבֵי תּוֹרָה יְהַלְלוּ רָשָׁע וְשֹׁמְרֵי תּוֹרָה יִתְגָּרוּ בָם.
5. אַנְשֵׁי רָע לֹא יָבִינוּ מִשְׁפָּט וּמְבַקְשֵׁי יְהוָה יָבִינוּ כֹּל.
6. טוֹב רָשׁ הוֹלֵךְ בְּתֻמּוֹ מֵעִקְּשֵׁי דְרָכַיִם וְהוּא עָשִׁיר.
7. נֹצֵר תּוֹרָה בֵּן מֵבִין וְרוֹעֶה זוֹלְלִים יַכְלִים אָבִיו.
8. מַרְבֶּה הוֹנוֹ בְּנֶשֶׁךְ וּבְתַרְבִּית לְחוֹנֵן דַּלִּים יִקְבְּצֶנּוּ.
9. מֵסִיר אָזְנוֹ מִשְּׁמֹעַ תּוֹרָה גַּם תְּפִלָּתוֹ תּוֹעֵבָה.
10. מַשְׁגֶּה יְשָׁרִים בְּדֶרֶךְ רָעָה בִּשְׁחוּתוֹ הוּא יִפֹּל וּתְמִימִים יִנְחֲלוּ־טוֹב.
11. חָכָם בְּעֵינָיו אִישׁ עָשִׁיר וְדַל מֵבִין יַחְקְרֶנּוּ.
12. בַּעֲלֹץ צַדִּיקִים רַבָּה תִפְאָרֶת וּבְקוּם רְשָׁעִים יְחֻפַּשׂ אָדָם.
13. מְכַסֶּה פְשָׁעָיו לֹא יַצְלִיחַ וּמוֹדֶה וְעֹזֵב יְרֻחָם.
14. אַשְׁרֵי אָדָם מְפַחֵד תָּמִיד וּמַקְשֶׁה לִבּוֹ יִפּוֹל בְּרָעָה.
15. אֲרִי נֹהֵם וּדְבִי טָרוּף מוֹשֵׁל רָשָׁע עַל־עַם דָּל.
16. נָגִיד חֲסַר תְּבוּנוֹת וְרַב מַעֲשְׁקּוֹת שֹׂנֵא בֶצַע יַאֲרִיךְ יָמִים.
17. אָדָם עָשׁוּק בְּדַם־נָפֶשׁ עַד־בּוֹר יָנוּס אַל־יִתְמְכוּ־בוֹ.
18. הוֹלֵךְ תָּמִים יִוָּשַׁע וּנְעֻקַּשׁ דְּרָכַיִם יִפֹּל בְּאֶחָת.
19. עֹבֵד אַדְמָתוֹ יִשְׂבַּע־לָחֶם וּמְרַדֵּף רֵקִים יִשְׂבַּע־רִישׁ.
20. אִישׁ אֱמוּנוֹת רַב־בְּרָכוֹת וְאָץ לְהַעֲשִׁיר לֹא יִנָּקֶה.
21. הַכֵּר פָּנִים לֹא־טוֹב וְעַל־פַּת־לֶחֶם יִפְשַׁע־גָּבֶר.
22. נִבְהַל לַהוֹן אִישׁ רַע־עָיִן וְלֹא־יֵדַע כִּי־חֶסֶר יְבֹאֶנּוּ.
23. מוֹכִיחַ אָדָם אַחֲרַי חֵן יִמְצָא מִמַּחֲלִיק לָשׁוֹן.
24. גֹּזֵל אָבִיו וְאִמּוֹ וְאֹמֵר אֵין־פָּשַׁע חָבֵר הוּא לְאִישׁ מַשְׁחִית.
25. רְחַב־נֶפֶשׁ יְגָרֶה־מָדוֹן וּבוֹטֵחַ עַל־יְהוָה יְדֻשָּׁן.
26. בּוֹטֵחַ בְּלִבּוֹ הוּא כְסִיל וְהוֹלֵךְ בְּחָכְמָה הוּא יִמָּלֵט.
27. נֹתֵן לָרָשׁ אֵין מַחְסוֹר וּמַעְלִים עֵינָיו רַב־מְאֵרוֹת.
28. בְּקוּם רְשָׁעִים יִסָּתֵר אָדָם וּבְאָבְדָם יִרְבּוּ צַדִּיקִים.